Shillong: Ha ka ri Khasi, ki don ki kyrteng ba ki briew ki ju jer ia ki lum ki wah, ki maw ki dieng bad kiwei kiwei katkum ka jinglap ne ka jingshem ne kaba lah ban dei na kano kano ka jingjia, kaba la pyllong ia ki ban leh kumta.
Kawei na kine, ngi la lap ka dei ka kyrteng kawei ka jaka jngohkai ka bym pat paw bha, kaba ka kyrteng, ka Madan Soitan. Haba shu sngap, ka kyrteng ka long kaba sngew ma haduh katta katta hynrei ynda la poi ha jaka, phin shem kaba itynnad bad shynna bha.
Kane ka don hajan ka shnong Sohkynduh, mar pyrshah bad ka jaka jngohkai, ka Riskai. Ban poi sha kane ka jaka, hap ban iaid na surok Sohra na Laitlyngew sha Laitmawsiang kaba don ka Garden of Caves bad kumba 5km eiei ha ka surok sha Sohkynduh, yn sa lap ia kane ka jaka.
Ka surok ka long kabab ha watla ka long kham khongwain bad rit kaba noh arsut ban iohi ia ki them bad ki lum ba ker sawdong katei ka thain.
Ban tip balei la khot ia kane ka jaka kum ka Madan Soitan, ngi la ioh ban iakren ia u trai kane ka jaka jngohkai, u bah Thrangsing Shabong, uba la iathuh ba ula dang shu pyrshang ban pynitynnad ia kane jaka dang mynshem snem bad ki khun khlem ioh jingiarap eiei.
U bah Thrangsing ula iathuh ba ia kane ka jaka, la ai kyrteng ki riew tymmen mynshwa bad ym tip na kaei ka daw, hynrei ka lah ban don eiei kaba la pyllong ia ki ban ai kyrteng ia katei ka jaka kumta.
Ha katei ka jaka ka long madan bad shapoh ka riat ba jrong bad lah ban iohi shynna ia ka Arwah, ka Jiva, ka Kut Madan kiba don ha Sohra. Shapoh ka don ka wah pungpung, kaba don ki thwei bad ksaid ba itynnad bha.
U bah Thrangsing ula shna ruh ia ka jaka bam khana ha katei ka jaka ha kaba ki briew ki lah ban leit bam sngewbha bad ka jaka pynieng kali kaba heh bad ngiam bun phew tylli.
Ha katei ka Madan Soitan la don ruh ki maw, ki dieng kum ki dieng sohskei, dieng sohpairiat bad kiwei kiban pynsngew tynnad ia kiba wankai.
Ka Madan Soitan (Devil’s Field) – ka jaka jngohai thymmai, ka kyrteng kaba sngew triem sngew ma, ka jaka pat kaba itynnad bha
