SHILLONG 28, Jymmang: Mynta ka sngi, u SP ka West Garo Hills u VS Rathore, u la ong ba 3 ngut kiba la pynsaphriang ha ki lad pathai khubor ban pynkhie im biang ia ka seng lehnoh Garo National Liberation Army (GNLA) kila shah kem noh ha ki pulit.
Ha ka kyrwoh, u Rathore u la ong ba hadien ba la ioh jingtip kaba biang, ki pulit kila thikna ba ki don lai ngut ki briew kiba la kynnoh ba ki la thmu ban pynkhie im biang ia ka seng GNLA ba kynthup ia u Namchang Ch Momin ba khot sin kum u Jingjang D Shira, 22 snem na shnong Darangagre, u Adot M Sangma, 26 snem na Ganipara bad u Silwit R Marak, 26 snem na ka shnong Nalnapara, kaba hap ha Dalu PS, WGH.
Ki pulit ha ka sngi Saitjain kila hiar sha katei ka jaka ban kyndang hynrei shwa ba kin poi, la ioh jingtip ba kine baroh lai ngut kila leit pyndem noh ha Kherapara OP. Mar mar ki pulit kila leit sha Kherapara OP ban tohkit ia ki bad hadien la leit ban khynra ia ka ïing sah u Namchang Ch Momin bad la ioh kurup ia ki sopti shipai, ki juri jrong, bad kiwei kiwei ki tiar bad la kem ia kine baroh lain gut.
U SP u la ong ba ka khubor kaba la mih ba kila thmu ban pynkhie im biang ia ka seng GNLA ka dei tang ka buit ban pyntieng kohtympan ban lute pisa na ki nongkhaïi. “La suba jur ba ki dang don sa katto katne ngut kiba iadon bynta ha kane ka kam bad ka jingtohkit ka dang iaid ban tih ia ka jingshisha”, la ong u Rathore.
U la kyntu ia ki paidbah ban pyntip sha ki pulit lada ki ioh kano kano ka jingtip ba iadei bad ki kam lehnoh bad ki pulit kin ai buskit ia kiba ai jingtip khlem da pynbna ia ka kyrteng jongki.