Shillong: Ha ka jingkylla ka sain pyrthei, ki nongialam ka BJP Meghalaya ki long kiba kmen tam hadien ba ki nongialam bapher bapher kynthup ki MLA, ki MDC kiba mynta bad kiba rim kila wan ban rung sha kane ka party, ka bym ju lah ban bsuh khlieh ha kane ka jylla.
Kane ka lah ban pynkhynniuh ir ia kiwei ki seng sain pyrthei kiba ju khein troin beit ia ka BJP ha man ki elekshon MLA, MDC ne MP.
Mynta ka sngi, u CEM barim ka JHADC uba dei ruh u MDC ba mynta bah Moonlight Pariat ryngkat ki nongialam, ula rung sha ka BJP ha kaba la pdiang sngewbha da u President ka BJP u Rikman Momin, ki MLA bah Sanbor Shullai, bah AL hek bad kiwei ha party ophis ha Shillong.
U bah Moonlight haba kren ha ka jingialang pdiang burom ia u, bad ki nongkyrshan, ula ong ba u don ka jingangnud ba ka sorkar BJP kan leh eiei ban pynkhlain iaki District Council ha ka jylla namar ba kum long mynta ki long kum ka kali khlem petrol.
Kawei pat ka dei ka mat ban pyllait dewiong ia ka jingshah khang ha kane ka jylla.