Shillong: Ka BJP Mawphlang Mandal ka la sngew donbok shibun eh hadien ba la wan rung u MLA ka UDP sha ka party, u bah Beyond Matthew Kurbah.
Haba iakren bad uwei na ki nongialam ka BJP Mawphlang Mandal, u bah Dmingstar Rani ula ong ba ka jingwan rung u MLA ka long ka jingsngew donbok ia ka BJP ha Mawphlang kaba la iakhyn tyngeh ha kine ki snem ba la leit bad ki paidbah ka Mawphlang konstitwensi kila ap ia ki kam u MLA ban leh ha kine ki shi snem bad lada u lah ban wanrah ia ki kam pynroi, kim don jingeh ban thep beit ha ka BJP.
U bah Dmingstar ula ong ba ka jingkynthoh ia ka BJP halor ka niam ka long bym lah ban pdiang namar ba ha u, ka niam bad ka politik ka dei ban iaid la kajong lajong. Ula ong ba mynshwa ruh ha ka por Congress ki kynthah kumba jia ia ka BJP mynta tang ban pyntieng ia u paidbah.
Ula kyrpad ia ki paidbah ka Mawphlang ba kin ai lad ia ka BJP shisien bad lada kam long, sa bret noh pat.
Ha kajuh ka por, u bah Samborson Rani ula ong ba watla u dei u nongkyrshan ka UDP hynrei ha ka jingsngew jong u, u pdiang ia ka jingleit rung BJP u MLA na ka bynta ban kyntiew shuh shuh ia ka roi ka par ka konstitwensi nalor ba u MLA ula iarap ban pynshna iing haduh 40 tylli tam ki iing ia kiba duk.
Ula ong ba ka jingkynthoh pyrshah ka don beit ia kano kano ka party ruh wat lada leh bha ne leh sniew ruh bad kam dei shuh ban sngewpher.
Ha kajuh ka por, ula pynpaw ba ka thain Tyrsad ka donkam shibun ki kam pynroi naduh ka jaka sumar kaba biang, ka iew tyrsad, ka madan ialehkai bad kiwei ban kyntiew ia ka thain.
Buh thong ka BJP Mawphlang ban jop ha 2028, sngew don bok ba wan u MLA
