Shillong: Ka KSU ka la leit ban tur bad thalain tyngeh ia ki pulit kiba ap ha ka iing tap tin ha surokbah ha ka thain Mawkhanu bad Thangshalai, East Khasi Hills halor ka jingkynnoh ba kila khrong pisa beain na ki trok.
Ki dkhot jong ka seng kila hiar mynta ka sngi sha katei ka jaka hadien ba ka la ioh ia ka jingujor na ki bun ngut ki briew halor ka jingdawa pisa beaiñ ki pulit Meghalaya ha ka National Highway ha Mawkhanu bad Thangshalai.
Ha ka jingialam u samla Alerick Kharjana, Education Secretary ka KSU CEC, ka la leit hiar sha Diengpasoh bad Thanglaskai ban jurip halor kane ka kam bad la lap ba ka la long kaba shisha.
Ha ki video kiba la phah ka seng sha ki lad pathai khubor, ka seng ka la kam bad kynnoh ba la iohi ba ki pulit ki shim pisa na ka trok bad ka la kynnoh ruh ba I kumba la don ka jingiapynbeit ba baroh ki trok kiba kit ïa ki tiar, ki marpoh khyndew, ki kali kit mar-bam ki hap ban siew sha ki pulit Meghalaya ïa ka pisa 200 haduh 500 tyngka shi trok.
Halor kane, u SP bah Vivek Syiem ula khie bitar tyngeh ia ka jingleh ki pulit namar ba ula ong ba la buh ia katei ka ktem ban ai jingshngain ia ki kali ba iaid ba ieng hynrei ka kylla ktem khrong pisa pynban.
Ula byrthen ban leh da kaba tyngeh ia kiba donkti katkum ka ain.
Bitar jur u SP ba kylla ktem khrong pisa ka ktem ai jingshngain | Byrthen ban dumok tyngeh ia kiba donkti
