Shillong: Ka United Democratic Party (UDP) ka la dawa ba pynduh noh ïa ka jinglong MLA jong phra ngut ki MLA kiba dang shen ki la mih na ka UDP bad pynïasoh sha ka Bharatiya Janata Party (BJP).
U Secretary ka UDP State Parliamentary Board, u Bah Allantry Dkhar, u la aiti ïa ka jingthoh jong ka party sha ka ophis u Speaker ka Meghalaya Legislative Assembly, da kaba kyrpad ban shimkhia halor ka jingpynïasoh party jong kine ki MLA.
U President ka UDP bad Parliamentary Party Leader, u Bah Metbah Lyngdoh, u la dawa ruh ban pynduh ïa ka jinglong dkhot Assembly jong kine ki phra ngut hapoh ki kyndon jong ka Tenth Schedule (Anti-Defection Law).
Kine ki phra ngut ki MLA ki la pynïasoh sha ka BJP ha New Delhi ha ka Sngi Balang, kaba la pynkiew ïa ka jingdon ki MLA ka BJP ha ka Ïingdorbar kaba don 60 ngut ki MLA, na 2 sha ka 10 ngut.
Ka UDP ka la sospon ruh ïa u Bah Ollan Sing Suin, u Bah Kyrmen Shylla bad u Bah Mathew Beyondstar Kurbah, hadien ba kim shym la jubab ïa ki jingpan jingshai kiba la phah da ka party.
Kawei na ki mat ba kongsan ha kane ka jingïakajia ka long ka two-thirds hapoh ka Tenth Schedule. Kine ki phra ngut ki MLA ki long ar bynta na lai bynta jong ka jingdon ki MLA ka UDP, kaba don 12 ngut.
Hynrei ka jingkylli kaba dang ap ïa ka jingpynshai ka long la kane ka jingïasoh lang jong ki phra ngut sha ka BJP ka lah ne em ban ïoh jingïada, namar ka UDP kum ka political party kam pat pynbna ba ka la ïasoh ne pynïasoh bad ka BJP.
Katkum ka Paragraph 6 jong ka Tenth Schedule, ka jingrai halor ka jingpynduh ïa ka jinglong MLA namar ka jingkylla party ka hap ha ka bor u Speaker.
U Speaker Thomas A Sangma u don mynta ha South Africa ban ïashim bynta ha ka 69th Commonwealth Parliamentary Conference ha Cape Town, bad la khmih lynti ba un wanphai sha Delhi ha ka 2 tarik Risaw.
Ka jingrai halor ka jingdawa jong ka UDP kan lah ban wan hadien ka jingbishar ïa ki petition bad ka jubab jong ki MLA ba shah kynnoh. Lada kawei na ki liang kam hun ïa ka rai u Speaker, ka kam ka lah ban poi shuh shuh sha Ïingbishar.