Shillong: U myntri khynnah ka tnad External Affairs & Textiles u Pabitra Margherita ula pynpaw kyndeh mynsiem ia ka jingitynnad ka jylla Meghalaya, kaban tan sak ia ki nongwankai na kylleng ki ri ka pyrthei sha kane ka jylla, kaban kyntiew ia ka kam jngohkai.
Haba kren hadien ba la wai ka prokram mynta ka sngi ha Shillong, u Pabitra u la ong ba ka North East khamtam haba kren ia ka Meghalaya ka dei kaba itynnad tam ha ka pyrthei bad ula ong ba ka Meghalaya ka dei ka jaka kaba la shna kyrpang u Blei, ki lum ki wah, ki khsaid, ki sim ki doh, bad ka sorkar India ka la iai don bad ka sorkar Meghalaya ban kyntiew ia ka kam jngohkai.
U myntri ula ong ba ka Meghalaya ka la ioh ruh ia ka GI Tag ia ka jain muka, bad ka North East ka dei kaba riew spah bha ha ki kam thain kti bad 52 percent ka thain kti handloom la pynmih na NE. Ka sorkar India ka la kyrshan ia ka sorkar jylla ban kyntiew shuh ia ki kam thain jain na Meghalaya bad ban leit pynpaw pyrthei shabar ri ruh.
Shwa ia kane u la sam shithi thungkam sha ki 127 ngut ki samla ha ka Rozgar Mela ha Shillong kiba dei na kane ka jylla na palat 51,000 tylli ki shithi thung kam ha ka ri sha
ki samla ba dang shu ioh kam sorkar bapher bapher. Ha kane ka bynta baroh kiba la ioh jingmyntoi hapoh ki Rozgar Mela ki la poi sha kumba 12.75 lak.
Ia ka prokram la pynlong ha State Convention Centre ha kaba u Myntri Rangbahduh ka ri u Narendra Modi u la ai jingkren sha ki samla ba dang shu ioh kam lyngba ka video conferencing ha kane ka prokram.
Ha kane ka prokram la ai shithi thung kam ia haduh 127 ngut ha nongbah Shillong. Kitei kiba dang shu thung kam thymmai kin leit ban sdang trei ha ki tnad bad ki kynhun sorkar bapher
bapher, kynthup ïa ka tnad Income Tax, Indian Railways, India Post bad kiwei kiwei.
Ia kane ka prokram la pynlong da ka Ophis jong u Chief Commissioner ka Income Tax, Shillong.
Ka Meghalaya ka dei ka jaka kaba la shna kyrpang u blei, ong u myntri ka sorkar India
