SHILLONG 27, Jymmang: U MLA ka Congress u bah Charles Marngar mynta ka sngi ula ong ba ka Congress ka dawa ba ka Roster system ka dei ban treikam nangne shakhmat katba ka dang bishar bniah ia ka Reservation Policy namar ba ka dei ka kam bah kam san ka bym dei ban shu leh kyrkieh jyndei.
Haba kren mynta ka sngi sha ki lad pathai khubor, u bah Charles ula ong ba ka parti ka la thaw ia ka Committee ban pule bniah ia ka Reservation Policy shwa ba kan shim ia ka rai ban pynshai sha ki paidbah.
U la pynksan nia ba ka jingkynoh jong ki paidbah ba ka Congress ka shu sngap jar jar halor ka Reservation, bad u la ong ba ka parti kam shym la sngap hynrei ka la shim khia khamtam hadien ba ka sorkar kala khot sha ka jingialang jong baroh ki seng sain pyrthei.
“La don bun kiba kylli ia nga, ia kiwei ki nongialam ka parti, shaei ka seng Congress, balei ka sngap jar jar kat kane ka mat. Hynrei nga kwah ban ong hangne ba ka parti Congress ka khlem sngar jar bad ka la shim khia ia kane ka kam hadien ba ka sorkar ka la khot ia ka jingialang jong baroh ki seng sain pyrthei, ha kaba ngi la leit ban iashim bynta halor ka jingiakren halor ka Roster System”, la ong u bah Charles.
U la ong ba ka nongrim jong ka parti halor ka Roster ka ieng ba dei ban iaid beit nangne shakhmat ym ban phai dieng biang sha u snem 1972. “Ka Congress kaba don ha ka liangpyrshah kam kyrshan ia ka sorkar hynrei ka pdiang ia ka Committee halor ka Roster kaba la thung ka sorkar”, u la ong.
Halor ka Reservation Policy, u la ong ba ka parti ka la thung ia ka Committee ban pule bniah ia ka Reservation shwa ban leit ban ai ia ka jingshai sha ki paidbah. “Ki don kiba kylli balei ka seng Congress ka shim por ban ai ia ka rai, na ka liang jong ngi ka long, ba ngi kham shim por khyndiat ban shim ia ka rai namar ba kane ka dei ka kambah kamsan”, la ong u bah Charles.
U la bynrap, “Kam long ban shu shim rai kyrkieh, ioh ba kan pynjynjar ia u paidbah. Ka Congress kan shim ia kano kano ka rai da kaba pyrkhat sani bha”.
Lah ban kdew ba ka mat Reservation Policy ka la khluit bha mynta hadien ba u nongialam ka VPP u bah Ardent M Basaiawmoit u la pynlong ia ka jingshah thngan khlem pud ban pynbor ia ka sorkar ba kan pynkylla thymmai ia kane ka policy, namar u la ong, ba ka la noh shiliang palat ban pynduh jingmyntoi ia ki samla Khasi.