SHILLONG 27, Jymmang: Ka Sorkar Jylla ka la pynbna ia ka jingthaw ia ka Committee jong ki seng sain pyrthei baroh ban iathir halor ka jingpyntreikam ia ka Roster System ha ka jylla.
Ha ka jingpynbna mynta ka sngi, ka Kong Ampareen Lyngdoh kaba dei ka myntri sorkar kan khlieh ia kane ka Committee nalor 11 ngut ki dkhot na ki seng sain pyrthei bapher bapher.
Ki dkhot jong kane ka Committee ki long bah Ardent Basaiawmoit (VPP), Zenith Sangma (AITC), Bah HM Shangpliang(BJP), u Augustine Marak (GNC), Bah Methodius Dkhar (HSPDP), Bah Ronnie Lyngdoh (INC), Bah Pyndapbothiaw Saibon (KHNAM), Bah WR Kharlukhi (NPP), Bah Renikton Lyngdoh Tongkhar (UDP), bad u Chief Secretary u Bah DP Wahlang u ba dei ruh u Commissioner and Secretary/Secretary Personnel & AR (B) department.
Ka Committee kaba la thaw ha ka 26 tarik Jymmang 2023, kan ai jingmut sha ka sorkar halor ka jingpyntreikam ia ka Roster system hapoh 15 sngi. Ka Committee ka lah ruh ban khot iano iano lada ka sngew donkam.