SHILLONG 24, Jymmang: U nongialam ka VPP u bah Ardent M Basaiawmoit u la ong ba un ym mih ne kynriah na jaka kaba u pynlong ia ka jingshah thngan haduh ba ka sorkar kan ai ia ka jubab ban pynbha ia ka Reservation Policy.
“Ngan sngew aiu haba ka sorkar kam jubab, ngin peit kein haduh katno ka lah ban sngap mynthi ba ka rai jong ngi ka long ban shong hangne. Ngan ym mih na kane ka jaka ngan ym kynriah na kane ka jaka tad haduh ba ka sorkar ba kan pynbna ba kan pynbeit thymmai ia ka Reservation Policy”, la ong u bah Ardent haba kren ha jaka u pynlong ia ka jingshah thngan ha phyllaw ka Additional Secretariat, Shillong.
U la ong ba ka jingshah thngan kaba marwei ne kaba bun kam don jingiapher than, ka shong ha ka jingkut jingmut. “Ka jingshah thngan kaba marwei ne kaba bun kam don jingiapher than, ka shong haduh katno ngi kut jingmut ban iakhun ia ka sorkar. Kumba long mynta ngi don ka jingmut kaba skhem bad ngi la shim ia kane ka sienjam ban shah thngan, ban pynkohnguh ia ka sorkar, te ngin pynkohnguh ia ka sorkar lyngba kane ka jingshah thngan”, la ong u bah Ardent.
Ka jingshah thngan u bah Ardent ka la iaid sha ka 30 kynta tam bad kan sa dap 36 kynta ha ka 25 tarik Jymmang 2023.