Shillong: U President ka VPP u bah Ardent Miller Basaiamoit ula buh jingkylli, balei ki jingiakhih kiba jai jai ki long kiba khlain kiba lah ban pynpoi sha ka jingjop bad ka daw ka long ba ki jingiakhih kiba wanrah ia ka jingkulmar ka jingmynsaw, kan pynioh kabu ia ka sorkar ban kiar na kaba shim ia ka jingkitkhlieh bad kan kdat noh ia ki mat kiba iadei ban iakren, ban iakhun bad ki briew kin kren noh ia kiwei ki bynta.
Haba kren mynta ka sngi ha video ba la pyllait sha ki lad pathai khubor, u bah Ardent ula ong ba kan long kabab ha shibun ban pynthikna ba ka jingiakhih kan ym thaw ia kano kano jingkulmar namar ba ka dei ka lad ia ki riew shim kabu ban thaw jingkulmar.
Ula ai khublei ia ki nongialam ka KSU kiba kloi ban pynpaw ban pdiang ia ki jingkynthoh, ki jingwohdaw wohdong ha kaba iadei bad ka jingjia kaba la mih ha ka rally ba ki pyllong, watla kila pynpaw ba ka long kaba jai jai bad pynrem jur ia kiba pynmih jingkulmar.
Ha kajuh ka por, u la ong ba ka jingmih ka jingkulmar ka dei namar bym shim ka sorkar ia ki sienjam ban tehlakam bad ula pynrem jur ia ki seng kali kamai na Assam kiba pyllong ia ka jingiakhih pyrshah halor kane ka jingjia, ka bym iahap dor bad kaei kaba jia ha kane ka jylla.